كيف تجعل الهبابولوجي سهلاً

كيف تجعل الهبابولوجي سهلاً

أولاً و قبل أي حاجة تانية لازم نعرف الكل ما هو الهبابولوجي

طبعاً هو أشهر من نانسي في مصر، بس برضه ناخد ثواب في اللي ما يعرفش نانسي- نانسي إيه بس لخبطتوني- قصدي اللي ما يعرفش الهبابولوجي

هي كلمة من مقطعين، و كلامي كله هيبقى عن المقطع الأولاني عشان عيب تبقوا في كلية البط البقري - عفواً – الطب البشري و انتوا مش عارفين معنى المقطع التاني ده إيه

كلمة

Hebab

كلمة لاتينية مشتقة من الكلمة العربية " هباب " عشان الإخوة اللاتينيين ما لقوش عندهم كلمة توصف الوضع زي الكلمة دي.. و ده يثبت و بما لا يدع مجالاً للشك إن العربي لغة العلم – في الحتة دي بس -

المقال ده موجه لبتوع تالتة

syndrome

المطحونين و لطلاب أولى و تانية المساكين عشان نحن السابقون و هم اللاحقون. أما بقى بتوع رابعة و طالع فخلاص خدوا إفراج – كفارة يا عم منك ليه و ما تنسوناش في العيش و الحلاوة بقى- بس ما تفرحوش قوي، ال

Community

و الباطنة و الجراحة هيعملوا معاكوا الواجب و زيادة

سيبونا من الحقد الطبقي ده بقى و ندخل في صلب الموضوع
هو الهبابولوجي ده إيه غير هباب و هباب و حبة حاجات فوق بعض كده – مع الاعتذار الشديد للإفِّيه -

الهباب الأولاني: النظري
ماله النظري؟ ده كله كتابين. واحد

General

كله بتاع عشرتلاف صفحة بس و حبة كسور و تتخللهم صفحات حمرا و خضرا و ملونة الله أعلم إيه دول – بالمناسبة، اللي يعرف إيه دول يبقى يديني

missed

عشان أستغله و يشرحهم لي -

المهم، عاملين منه فيلم هندي ليه بس؟؟ يا عم منك ليه، كأنك بتقرا رواية

Gone with the Wind ،

صدقوني مش هتفرق كتير، كله هيذهب مع الريح حتى لو عملت فيها قرد و اتنططت فوق و تحت.

و التاني بقى

" Special "

اللي إحنا لسة مستلمينه قريب ده، حصل لكم القرف طبعاً – إحم إحم، قصدي الشرف-، و المكتوب بيبان من عنوانه،

" Special Hebabology "

هيكون إيه يعني؟؟ لازم يكون عندكوا فَرَاسَة، الجزء التاني من

" Gone with the Wind "

طبعاً..

خلاصة القول: عايز تهضمه النظري ده، عليك بالفيلم و معاك الكانز. فيفيان لي أحسن من أجدعها كتاب

الهباب التاني: ال

Slides
مالها؟ عاملين منها قواضي و محاكم ليه بس؟؟
ده مفيش أظرف منها، هتبص تحت الميكروسكوب، هتلاقي بُطَش حمرا × زرقا و أحياناً ممكن تقلب على إسود × كحلي.. عادي و لا تاخد في بالك. هو إحنا يعني بيهمنا حاجة لا قدر الله؟؟؟
مش عاجبة حضرتك الألوان، إنقع الشريحة في شوية كلوروكس هتبقى إيه، منورة و فلة. و شوف اللي انت عاوز تشوفه، شغل خيالك.. إيه!! ما عندكش خيال!! مش غلطة الهبابولوجي بقى، الراجل أهه طلع براءة.. طلبة إيه دول بس؟؟ عجبي

الهباب التالت: المتحف
يا عم الأمور، إعتبر نفسك داخل متحف الأسماك اللي جنب القلعة في اسكندرية. ما رحتهوش!! ماشي

هو عبارة عن أحواض فيها سمك جوا مية يعني ما فرقتش كتير، عندك جارات فيها

Organs

جوا فورمالين، هيا هياها. و بعدين ده متحف، يعني كل حاجة فيه فيها عبق التاريخ و الماضي. واخد بالك انت من جار ال

Spleen

اللي ما أعرفش مشكلته إيه بالظبط لولا إن ربنا مبارك فيه حبتين.. أهو ال

Spleen

ده من موميا الملك خوخع ال29 من الأسرة العشرتاشر. شفتوا بقى، الهبابولوجي مش حارمكم من حاجة خالص و انتوا اللي ظالمينه

الإمتحانات بقى.. الهباب الكبير
كلمات متقاطعة، متاهات و ألغاز.. من الآخر، كل اللي قلبك يحبه... أطلب و اتمنى.. تسلية برضه. عشان كده كبَّر و اتبع المثل القائل " طنش تعش تنتعش، شعرك يقف و ينتكش" و أهو برضه توفر تمن إزازة الجيل أم تلاتة جنيه إلا ربع

الشيتات.. الهباب الأخير
دي بقى ربنا يتولاكم فيها، يا إما تموت من القتال للحصول على واحد، يا إما تموت من الملل في المحاضرة وانت مستنيهم يتوزعوا. و في الحالتين إن شاء الله أنت شهيد لك الجنة؛ لأنك طالب علم

شفتوا بقى.. الهبابولوجي سهل ازاي